Beneficiarios
Os concellos da provincia de Pontevedra cunha poboación de dereito de ata 50.000 habitantes, segundo a correspondente certificación expedida polo Instituto Galego de Estatística (IGE) referida á última actualización do censo na data de publicación no Boletín Oficial da Provincia de Pontevedra (BOPPO) desta convocatoria, e nos que non concorra ningunha das circunstancias ou prohibicións ás que fai referencia a lexislación vixente en materia de subvencións.
Obxecto
As finalidades subvencionables deberán demostrar o seu carácter estratéxico local e realizarse sobre elementos de titularidade municipal ou sobre bens, instalacións ou terreos nos que se acredite a titularidade. No caso de que se trate dunha Administración pública, poderá acreditarse a titularidade coa correspondente cesión, autorización ou concesión; de ser un suxeito xurídico privado, a cesión terá unha duración de 50 anos, salvo que o investimento teña unha vida esperada superior.
Serán actuacións subvencionables, sempre que se trate de actuacións que, de forma real e efectiva, sexan de competencia municipal, os seguintes tipos de investimentos:
| INVESTIMENTOS SUBVENCIONABLES |
| Actuacións elixibles | Detalle |
| Novas infraestruturas públicas | Construción de edificacións, inmobles ou equivalentes |
| Novos equipamentos, dotacións, instalacións ou outras análogas |
| Infraestruturas públicas existentes | Rehabilitación |
| Mellora |
| Modernización |
| Reforma |
| Intervencións en espazos públicos urbanos ou naturais | Humanización |
| Urbanización |
| Reurbanización |
| Recuperación |
| Mellora |
| Elementos necesarios para a recollida separada de biorresiduos de orixe doméstica (5.º contedor) | Compra de vehículos |
| Compra de contedores |
| Outros elementos necesarios para o cumprimento das obrigas establecidas no artigo 25.2 b) da Lei 7/2022, de 8 de abril, de residuos e solos contaminados para unha economía circular |
Bases reguladoras
O procedemento de concesión e xustificación das subvencións que se outorguen no marco deste plan rexerase polo disposto nas Bases reguladoras do Plan Provincia Extraordinaria-Plan Extra, e será de aplicación supletoria o contemplado na LXS.
Contía e aplicación orzamentaria
A cantidade prevista para o financiamento deste plan ascende a trinta e cinco millóns (35.000.000,00) de euros, imputables á aplicación 2024/942.9420.762.84 do orzamento da Deputación Provincial de Pontevedra para o ano 2024.
Prazo de presentación de solicitudes
O prazo de presentación de solicitudes é dun (1) mes, contado a partir do día seguinte ao da publicación da convocatoria e do seu extracto no BOPPO e na Base de Datos Nacional de Subvencións (BDNS).
Forma de presentación de solicitudes
As solicitudes presentaranse obrigatoriamente na Sede electrónica da Deputación de Pontevedra, https://sede.depo.gal, de acordo co procedemento electrónico establecido para o efecto. Deberá acompañarse a documentación esixida conforme a base décima.
Para a presentación das solicitudes a Sede electrónica da Deputación de Pontevedra admite os certificados electrónicos do sistema Cl@ve, que contempla a utilización de sistemas de identificación baseados en claves concertadas (sistemas de usuario e contrasinal) e certificados electrónicos (incluíndo o DNIe).
Outros datos
— Procedemento de concesión: concorrencia competitiva, conforme os requisitos e criterios establecidos nas bases quinta e sexta das reguladoras do plan
— Gastos subvencionables: os recollidos na base primeira
— Compatibilidade: si
— Forma de pago: transferencia
— Forma de xustificación: mediante a achega da documentación xustificativa prevista na base décimo novena
— Prazo máximo de execución e xustificación: os investimentos deberán estar executados na súa totalidade o 31 de outubro de 2026; en todo caso, o prazo de xustificación será ata o 31 de marzo de 2027.
