A Xunta vai crear entre este ano e o que vén a rede galega de concellos con Bandeira Verde e traballará para poñer en valor en Europa o esforzo que realizan estes municipios nas boas prácticas medioambientais e na protección da paisaxe, mostrando o bo facer de Galicia neste eido
Así o anunciou hoxe a conselleira de Medio Ambiente e Cambio Climático, ángeles Vázquez, durante o izado deste distintivo no concello de Sanxenxo, onde tamén indicou que nos próximos días sairá publicada no Diario Oficial de Galicia a convocatoria deste ano para a concesión deste recoñecemento a aqueles concellos que teñen un marcado compromiso co desenvolvemento de accións no eido medioambiental.
Deste xeito, os municipios interesados e que realizan accións deste tipo poderán presentar as súas candidaturas á edición de 2025 deste galardón -a sexta desde que se puxo en marcha en 2020- a partir da vindeira optando a un distintivo que tamén ofrece vantaxes como maior puntuación á hora de acceder a axudas relacionadas co patrimonio natural e coa xestión dos residuos.
A responsable autonómica incidiu en que as bandeiras verdes gozan cada vez de maior aceptación e interese por parte dos concellos, como demostra o feito de que se producise un incremento constante do número de galardoados desde a primeira edición ata acadar o ano pasado un total de 24.
Neste sentido, ángeles Vázquez puxo en valor que este distintivo supón un recoñecemento aos municipios que destacan no desenvolvemento de boas prácticas para o coidado da súa contorna, o respecto pola paisaxe, a redución das súas emisións de dióxido de carbono (CO2), a posta en valor de monumentos naturais, a educación e sensibilidade ambiental ou a redución do consumo enerxético, entre outras.
Por iso, a titular de Medio Ambiente e Cambio Climático animou aos concellos a esforzarse nestas cuestións co fin de concienciar ao conxunto da cidadanía sobre a importancia de ser responsable nos eidos ambiental, paisaxístico e de respecto ao patrimonio natural da comunidade. De feito, o distintivo Bandeira Verde pretende exercer de correa de transmisión entre o traballo que fan as administracións locais e a implicación da veciñanza no coidado e protección da súa contorna.
Todo isto, salientou a conselleira, redunda na integridade e sostibilidade dos recursos naturais de Galicia en sintonía cos 17 Obxectivos de desenvolvemento sostible (ODS) e os obxectivos da Unión Europea para o ano 2050 de redución de emisións. Trátase ademais de medidas que contribuirán a cumprir co obxectivo da comunidade de acadar a neutralidade climática en 2040.
Cómpre subliñar que a Bandeira Verde vai na liña dos principios inspiradores da Lei de protección da paisaxe de Galicia e se enmarca ademais na aposta decidida do Goberno galego polo fermosismo. O obxectivo principal do Instituto de Estudos do Territorio, organismo responsable da creación e xestión do distintivo, é recoñecer o traballo daquelas entidades locais que no marco das súas competencias destaquen polas súas boas prácticas ambientais e a prol da conservación e protección da paisaxe.
O caso de Sanxenxo
ángeles Vázquez destacou especialmente o compromiso do Concello de Sanxenxo coa protección do medio ambiente e o coidado da contorna, o que lle serviu para recibir a Bandeira Verde tanto en 2023 como en 2024. Nesta liña, subliñou que este municipio é un escaparate perfecto para mostrar no resto de España e do mundo a excelencia medioambiental de Galicia polas súas magníficas paisaxes naturais, praias, calidade das augas de baño así como a gastronomía ou as súas xentes.
A conselleira puxo en valor que Sanxenxo é en si mesmo un refuxio climático grazas ao desenvolvemento nos últimos anos de distintas iniciativas como un plan de mobilidade sostible de 2019, un plan de acción para o clima e a enerxía sostible en 2020 ou unha axenda urbana con horizonte no ano 2030.
